Joavan posibleng mahimo pang maayong lider

CEBU, Philippines -  Naglaom pa gihapon si Sr. Supt. Melvin Ramon Buenafe, hepe sa Cebu City Police Office (CCPO) nga mag-usab si Joavan Fernandez ug mamahimo pang maayong lider sa dakbayan sa Talisay sa umaabot kung kini mag-usab karon palang mga panahona.

Si Buenafe nagkanayon nga nagka-estorya sila sa telepono ni Talisay City Mayor Socrates Fernandez kagahapon sa buntag ug iyang gitanyagan nga mopahigayon siya og activities alang sa iyang sinagop nga si Joavan Fernandez.

Si Joavan nadakpan sa niaging adlaw sa kapulisan pinasikad sa Warrant of Arrest (WOA) tungod sa kaso section 11 sa Republic Act 9165 ug nakapiyansa nianang pagkahapon.

Matud ni Buenafe nga gawas sa feeding program ni Mayor Fernandez diha sa dakbayan sa Talisay nga gidumala ni Joavan nagkinahanglan gyud og tabang si Joavan kay dako pa kaayo kini og kahigayonan nga mausab hinungdan nga iyang gitanyagan sa tabang sama sa church activities.

Gitataw sa maong opisyal nga mipasalig ngadto kaniya ang mayor nga iyang patambungon si Joavan sa Santos nga Misa karung adlaw’ng Domingo apan karun pang Biyernes iyang paabuton ang kompirmasyon sa mayor.

Plano ni Buenafe iyang hangyuon ang tagdumala sa simbahan nga pabasahon sa ebanghelyo si Joavan atol sa Santos nga Misa karung Domingo.

‘He is a young popular, I told him (Joavan) you are at the right age already to make a big change in life,” matud pang Buenafe ngadto ni Joavan.

Matud ni Buenafe nga mipasalig kaniya ang mayor nga iyang i-arrange si Joavan aron mahinayon karung Domingo.

Gitin-aw niini nga nagkaestorya usab sila ni Joavan sa miaging adlaw sa dihang nadakpan kini sa mga sakop sa Investigation and Detective Management Branch (IDMB) nga pinangulohan ni Chief Insp. George Ylanan.

Matud ni Buenafe nga dunay admission kaniya si Joavan sa ubang mga butang apan duna say denial sa ubang mga gihimo niini sa publiko.

Si Buenafe nagtuo nga kung mausab si Joavan posibleng mahimo pa kining lider sa umaabot diha sa dakbayan sa Talisay.( EIM) (BANAT NEWS)