51-anyos milugos sa pag-umangkon

CEBU, Philippines - Nagtingkagol sa detention cell sa Asturias Police Station ang 51-anyos nga biyudo kinsa gipasanginlang milugos sa iyang 17-anyos nga pag-umangkon niadtong Lunes sayo sa buntag diha sa usa sa mga barangay sa nahisgutang lungsod.

Ang maong uyoan gikatakdang pasakaan og kasong pagpanglugos karong adlawa diha sa Provincial Prosecutor’s Office, dakbayan sa Sugbo.

Giingong naghatud og pamahaw ang biktima sa suspek diha sa iyang umahan nianang tungura dihang kalit kining gitionan sa suspek og sundang ug gidala sa payag ug giamong-amongan.

Human niini gihulga ang bata nga patyon kung mosupak sa sunod nga iya kining ‘gamiton’ ug kung kini mosumbong.

Si SPO2 Dennis Nocus sa Asturias Police Station nagkanayon nga human sa hitabo ang menor de edad bisan nahadlok misumbong ngadto sa ilang silingan kinsa mao nay mi-report ngadto sa mga tanod.

Tungod niini gidakop ang suspek sa balay niini ug gitugyan ngadto sa mga polis, apan ang suspek hugtanong mihimakak sa pasangil kaniya bisan paman migawas na ang resulta sa medical examination nga nalugos gyud ang bata.

Matud pa ni Nocus nga 8-anyos pa ang bata dihang gibilin sa mga nagbuwag nga ginikanan diha sa suspek. (BANAT NEWS)