Lay minister nadasmagan patay

CEBU, Philippines - Patay ang usa ka lay minister human dasmagi sa usa ka bus pasaheroan samtang naglakaw paingong modumala og Santos nga Misa sa simbahan didto sa barangay Talisay, lungsod sa Santander niadtong Domingo sa buntag.

Ang biktima mao si Francisco Aviso, 62, ulitawo, ug usa ka lay minister sa simbahan nga nagpuyo sa maong lugar.

Ang nakadasmag sa biktima mao ang Ceres Bus nga may plaka nga GEK-651 nga gemaniho ni Anecito Camanan, 49, minyo, nga taga barangay Labay, lungsod sa Argao.

Si PO3 Gabriel Discarten sa Santander Police mibutyag sa Banat News nga ang biktima naglakaw sa karsada niadtong higayona paingon sa simbahan   dihang ang Ceres bus nga mao pay paggawas gikan sa iyang grahian kalit nga midasmag kaniya.

Ang biktima nga nalagpot ug nag-una ang ulo sa pagtugpa sa tunga sa karsada dali nga nabugtoan sa kinabuhi.

Gisuwayan pa og hatod sa mga nakasaksi ang biktima ngadto sa Oslob District Hospital apan gideklarar kining dead on arrival.

Samtang ang drayber sa Ceres bus mitahan usab dayon sa iyang kaugalingon ngadto sa kapolisan human sa hitabo ug nagtingkagol na karon sa karsel samtang nagpaabot sa tukmang sumbong nga ipasaka batok kaniya. (WC) (BANATNEWS)