Mag-rap sa jeepneys ipabadlong gyud

CEBU, Philippines - Nanawagan ang hepe sa Cebu City Anti-Mendicancy Task Force (CCAMTF) nga si Isabelita Ganub ngadto sa mga drayber sa mga pasaheroan nga badlungon kining mga ‘rapper’ nga mokalit og angkas ug dayon manganta sulod sa jeepney ug mangayo og sensilyo sa ilang mga pasahero.

Sumala pa ni Ganub nga naa sa drayber ang unang responsibilidad sa pagsitar sa maong mga rappers nga nakahasol pag-ayo sa mga pasahero.

Dugang pa niya nga kanunay usab karon ang gibuhat nila nga regular nga pag-roving sa mga kadalanan aron masumpo ang mga binuhatan sa mga ‘rappers’ diin ang uban kanila gituohang mga tulisan.

Mopadala na og suwat ang CCAMTF ngadto sa buhatan sa City Traffic Operations Management aron mohangyo nga moapil sila sa mga oriyentasyon sa mga drayber ug pahimangnoan kini sa nag-una nila nga responsibilidad.

“Mohangyo gyud mi sa CITOM, nga moapil sa among operasyon kay grabe man gud nga kahasol ang nahatag anang mga rappers. Sa mga drayber pud, dapat pakanaugon gyud nila kung dunay mosakay nga mga rappers sa ilang unit,” matud pa ni Ganub.

Dili magpangikog ang CCAMTF sa pagdakop sa mga rappers ug duna kini multa nga P1,000 base sa City Ordinance 1631 nga nagdumili sa pagpangayo og kwarta o ba kaha pagpanglimos.

Apan kadaghanan sa mga drayber miangkong nahadlok silang mobadlong sa maong mga batan-on tungod sa kabalakang sila usab ang atangan ug pahimungtan.

Usa ka drayber nga gikahinabi sa Banat News mibutyag nga sagad sa mga ‘rappers’ anha manakay sa dalan MJ Cuenco hangtud sa dalan Manalili. (BANATNEWS)