Pipila sa taga Mahiga Creek nakadawat na

CEBU, Philippines - Gihimakak sa hepe sa Squatters Prevention and Encroachment Elimination Division (Speed) nga si Noel Artes ang mga akusasyon sa mga kritiko ni Mayor Michael Rama nga basta-basta lang kini mipademolis nga walay relocation site ug financial assistance sa mga panimalay sa Mahiga Creek.

Sumala pa ni Artes nga dunay gibuhat nga aksyon ang gobiyerno ug duna na sila’y gitaganang relocation site hinungdan nga dili sila pwede makahatag og financial assistance.

Matud pa niya nga naa sa balaod nga dili pwedeng tagaan og financial assistance ang mga tawo nga mahatagan og relocation site.

Moabot sa 72 ka mga luna ang nahimutang sa nagkadaiyang barangay ang gipapilian sa mga maapektohan sa demolisyon.

Apan subo palandungon nga bisan pa man sa gihimo sa siyudad alang sa ilang relokasyon, ang mga residente maoy nagmagahi ug mipasangil pang basta lang sila gipapahawa nga way relokasyon ug financial assistance.

Nasayran nga pipila sa mga lumulopyo sa Mahiga Creek ang misang-at og sugyot nga magpatukod og building sa ilang dapit aron magsilbi nila nga kabalhinan apan dili kini mahimo sanglit wala na ma’y igong lugar alang sa maong sugyot.

Dugang pa ni Artes nga niadtong tuig 2008 pa ang kamandoan nga demolison ang mga tawo nga nagpuyo duol sa Mahiga Creek apan kanunay kining maoktaba gumikan sa nagkadaiyang mga hangyo sa mga residente nga lugwayan ang ilang pagpuyo sa maong dapit.

Samtang gipadayag ni Rama nga andam niya nga atubangon ang kaso nga gipasaka batok kaniya sa mga lumolupyo sa Mahiga Creek ug sa presidente sa Pagtambayayong Foundation nga si kanhi city administrator Francisco “Bimbo” Fernandez.

Sumala pa ni Rama nga nakugang siya sa maong lakang sanglit mihatag na man unta siya og solusyon alang sa kabalhinan sa mga maapektahan sa clearing operation.

Matud pa niya nga mitanyag na siya og temporaryong pinuy-anan samtang mangita pa sila og haom nga relocation site nga ilang mauyonan.

Samtang ipasusi usab karon sa Division for the Welfare of the Urban Poor (DWUP) ang taho nga matud pa nga duna na’y nahatagan og financial assistance sa pipila ka demolison niadto pang tuig 2005 apan human dawata ang salapi wala mopahawa sa ilang nahimutangan.

Nagplano karon ang dakbayan nga mohimo og legal nga aksyon niadtong mga residenteng nakadawat na sa maong financial assistance nga wala gihapon mopahawa. (BANATNEWS)