Giluba atubangan sa simbahan patay

CEBU, Philippines - Patay ang usa ka manindahay og kandila human kini dunggaba sa usa ka lalaki atubangan sa simbahan sa Saint Joseph Parish pasado alas-5 sa miaging hapon sa barangay Tabunok sa syudad sa Talisay.

Ang biktima nailhan nga si Carlito Ibon, 30, taga barangay Lorega-San Miguel sa dakbayan sa Sugbo nga usa ka manindahay og kandila samtang ang suspetsado nailhan usab nga si Pedro Campayan, 27, lumad nga molupyo sa Bahing-Tubing sa lungsod sa Pinamungajan ug lakip sa gidakop mao ang asawa niini kansang pangalan wala ibutyag sa mga polis.

Sa inisyal nga imbestigasyon sa kapolisan sa syudad sa Talisay nasayran nga ang biktima naninda og kandila atubangan sa simbahan dihang giduol sa suspetsado uban sa duha ka kaubang nailhan lang sa pangalang Mark ug Jun.

Matud pa nga gikomprontasi sa suspetsado ang biktima kalabot sa pagkulata niini sa usa ka Jerry Godines niadtong Biyernes sa kaadlawon sa barangay Tabunok.

Apan nainsulto ang suspek dihang gipikpik na hinuon sa biktima ang iyang nawong ug wala siya tubaga niini dungan sa pag-abot sa asawa sa suspek ug giingong misulsol nga ipadunggab nalang ang biktima.

Bisan diha sila sa atubangan sa simbahan daw nayawaan ang suspek ug daling mibunot og kutsilyo dayon gihansakan sa kilid sa lawas si Ibon ug naglumbaanay sila sa pagpanagan palayo.

Ang biktima daling gitabang sa mga tawo ug gidala sa Talisay District Hospital ug pagkahuman gibalhin ngadto sa Vicente Sotto Memorial Medical Center apan gideklarar na kini nga dead on arrival.

Ang suspetsado nga misuway unta pagsibat kuyog sa iyang asawa naabtan sa mirespondeng mga polis.

Ang magtiayon kasamtangang nagtingkagol sa Talisay City Police Station samtang nagpaabot sa tukmang kaso nga isang-at batok kanila. (EIM)(BANAT NEWS)