Capitol, City Hall, CCCI mipirma'g MOA

CEBU, Philippines -  Gipangulohan ni Gobernador Gwendolyn Garcia ang pagpinirmahay sa Memorandum of Agreement (MOA) tali sa kagamhanan sa Probinsiya, Dakbayan sa Sugbo ug sa Cebu Chamber of Commerce and Industry Inc. (CCCI) niadtong Biyernes 

Ang maong MOA may kalambigitan sa mga gimbuhaton nga pagpalapad sa Turismo, Information Technology, Business Outsourcing ug ingon man ang Industrial Technology dinhi sa dakbayan ug lalawigan sa Sugbo pinaagi sa pagpakigtambayayong sa mga establisimentong pribado ug sa gobiyerno.

Gihimo ang MOA signing atol sa gipahigayong General Membership Meeting and Induction of Officers and Trustees nga gipangulohan sa bag-ong pangulo sa CCCI nga si Consul Samuel Chioson didto sa Grand Ballroom sa Marco Polo Plaza Cebu kagahapon.

Gipaabot usab sa gobernador ngadto sa mga opisyal ug mga sakop sa CCCI ang iyang mainitong pahalipay ug kahinangop sa grupo kalabot sa ilang malampusong programa sa milabay’ng tuig.

Laing gipadangat sa gobenadora ngadto sa mga opisyal sa CCCI ug sa mga sakop niini ang iyang walay puas nga suporta niining tuiga.

Mahinumdoman nga ang tigpaniid nagkanayon nga ang Sugbo sama sa usa ka kuronang mutya nga maoy tinubdan sa local ug international trade kon pamatigayon. (BANAT NEWS)