CEBU, Philippines - Giaprobahan na ni Mayor Michael Rama ang rekomendasyon sa iyang chief of staff nga si Philip Zafra nga angayan tangtangon sa iyang serbisyo ang usa sa mga empleyado sa City Hall nga si Oliver Ruiz kinsa gipasanginlan nga mi-harass sa usa ka 19-anyos nga on-the-job-trainee pinaagi sa text messages.
Ipasusi na usab karon ni Zafra sa Human Resource Development Office kung kanus-a na lang taman ang kontrata ni Ruiz sa City Hall. Ang 19-anyos nga OJT nadestino sa Cebu City Hospitalization Assistance and Medicines Program mipasangil kang Ruiz nga gihadlok siya nga i-post ang iyang hulagway nga naka-swimwear.
Matud pa niini nga nasuko si Ruiz kaniya gumikan kay wala kaayo niya kini tagai og atensyon hinungdan nga mibuhat kini sa maong klase nga pagpanghulga. Ang chief of staff ni Rama mihimo og lapad nga imbestigasyon ug nasuta nga dunay igong basehan ang reklamo sa OJT.
Ang OJT nagsugod sa iyang trabaho sa City Hall sugod niadtong Abril 18 isip kabahin sa gi-require sa iyang tunghaan nga 200 ka oras nga pagtrabaho sa usa ka establisamento. /EIM (BANAT NEWS)