Milabay og basura gisikop

CEBU, Philippines- Gidakop ang usa ka lalaki nga nagdala og basura gikan sa dakbayan sa Sugbo nga iyang gilabay sa reclamation area sa dakbayan sa Mandaue niadtong miaging hapon gikan sa gikargahan niining traysikad.

Ang nadakpan mao si Delon Quijano, 33, taga dalan Flores sa sitio Mahayahay, barangay Pasil, dakbayan sa Sugbo kinsa nadakpan sa akto sa mga sakop sa Mandaue City Solid Waste Management Program nga gipangulohan ni Placido Jerusalem.

Matud pa ni Jerusalem nga dali nilang gisusi ang maong lugar dihang ilang nadawat ang taho labot sa usa ka tawo nga nagdiskarga og mga basura sa bakanteng luna sa maong lugar nga naglakip sa biya nga mga goma.

Gitataw ni Jerusalem nga nakalapas si Quijano sa probisyon sa Local Ecological and Solid Waste Management Ordinance nga nagdili sa paglabay sa basura o pagdaob niini.

Si Jerusalem nagpatabang sa kapolisan sa Presinto 2 sa Subangdaku sa dakbayan sa Mandaue nga maoy midakop kang Quijano.

Si Quijano giisyuhan og citation tiket ug gipamulta og P2,500 ug gi-impound usab ang traysikad niini. Ang Metro Cebu naghigpit na karon sa koleksyon sa basura nunot sa implementasyon sa Solid Waste Management Act.   (BANAT NEWS)