Hinabang sa nasunogan nagbaha

CEBU, Philippines - Gipabaha sa dakbayan sa Mandaue ang ilang hinabang ngadto sa nabiktima sa sunog sa barangay Tawason sa miaging Huwebes sa hapon.

Si Maricel Yu, hepe sa Mandaue City Social Welfare Services miingon nga ang ilang tabang ngadto sa napulo ka pamilyang biktima naglakip sa bugas, mga linatang pagkaon, gatas ug uban pang gamitonon sa kusina.

Gawas niini ang mga opisyal sa barangay Tawason nga gipangunahan ni kapitan Jesus Arcilla miingon nga nanghatag usab sila og mga senina, habol, unlan, tsinilas ug uban         pa.

Midugang si Arcilla nga nagpabarog usab sila og mga tulda sa bakanteng lugar duol sa nasunogan diin anaa temporaryo karong namahulay ang mga biktima.

Unya gawas niini, miingon si Arcilla nga gipalihok usab niya ang mga sakop sa barangay nutrition worker kinsa maoy nangluto og pagkaon alang sa mga biktima.

Nasayran gikan kang SFO3 Roy Garcia nga ang hinungdan sa maong sunog mao ang katol nga gidagkotan ni Cresencio Salvador sulod sa ilang balay.

Gibanabana niya nga mikabat sa P400,000 ang balor sa mga kabtangang naugdaw sa maong hitabo.   (BANAT NEWS)