Kamot sa nurse gibunala'g armas

CEBU, Philippines- Mikitiw sa kasakit ang kamot sa usa ka registered nurse nga gibunalan sa armas sa usa ka wala hiihing armadong lalaki nga nagsakay og motorsiklo didto sa sitio Fatima, barangay Jubay, lungsod sa Liloan kagahapon sa alas 6:00 sa buntag.

Ang biktima mao si Cristy Gabinete, 21, dalaga nga nagpuyo sa maong dapit.

Si PO3 Rochelle Jugalbot sa kapolisan sa maong lungsod nga nahinabi sa Banat News miingon nga naglakaw ang biktima gikan sa ilang balay paingon sa dalan national sa barangay Jubay aron mag-atang og PUJ paingon sa iyang trabaho. Dugang pa ni PO3 Jugalbot nga nakurat nalang ang biktima dihang kalit kining gihunongan sa usa ka motorsiklo ug gitionan dayon og armas de fuego sa nag-inusarang sakay niini uban sa pagdeklarar nga tulis.

Apan bisan diha sa kakuyaw wala dayon ihatag niini ang iyang shoulder bag nga gibunlot sa tulisan busa gihapak sa tulisan sa pul-an sa iyang armas de fuego ang kamot sa biktima.

Mikitiw intawon sa kasakit ang kamot sa biktima busa nabuhian niya ang iyang bag busa gisakiyo dayon kini sa tulisan kinsa mipabulhot dayon sa iyang motorsiklo.

 Matud pa ni PO2 Jugalbot nga subay sa gisugilon sa biktima nga ang sulod sa iyang   bag mao ang cash P160, Philippine Regulatory Commission ID, Philippine Nurse Association ID, Bureau of Internal Revenue ID ug company ID sa Norkis Trading Industries sa dakbayan sa Mandaue nga gitrabahoan niini.

Si PO2 Jugalbot miingon nga nagpadayon pa ang ilang follow up karon aron sa pag-ila sa maong tulisan nga nagsakay og motorsiklo nga ilang gituohang naglihok sa maong lugar ug silingang lungsod sa Consolacion ug Compostela.