MCIAA charter gihingusgan amendahan

CEBU, Philippines- Gipanghingusgan sa mga opisyal sa dakbayan sa Lapulapu ang lakang sa pag-amendar sa MCIAA Charter nga magbutang og representante gikan sa dakbayan sa Lapulapu ngadto sa MCIAA Board.

Kini maoy hinungdan nga ang tanang mga konsehal sa dakbayan sa Lapulapu, Bise Mayor Marcial Ycong ug Lapulapu City Mayor Paz Radaza atua sa kaulohan alang sa pagtambong sa ikaduhang congressional hearing sa maong resolution nga mag-amendar sa MCIAA charter nga gipangamahanan ni Lapulapu City Lone District Congressmen Arturo “Boy” Ompad Radaza.

Matud pa ni Mayor Radaza nga mao kini ang unang higayon nga ilang tambongan ang hearing sa maong resolution sa ikaduhang higayon sa hawanan sa Kongresso aron ilang mapadayag ang kamahinungdanon sa representasyon sa dakbayan sa Lapulapu sa MCIAA board.

Bisan pa nagsumpaki ang mga petition nga gisumiter nila ni Cebu City North District Congresswomen Cutie del Mar ug Cebu 2nd District Cong. Pablo John Garcia apan hingusgan gyud sa mga opisyal sa dakbayan sa Lapulapu ang pagsulod sa representante niini nga pinili sa lokal nga kagamhanan sa dakbayan sa Lapulapu.

Base sa petition ni Cong. Del Mar gipadayag nga kinahanglang gikan sa Cebu Chamber of Commerce and Industry ang mopili sa paglingkod sa usa sa tulo ka representante sa pribadong sector sa MCIAA Board.

Si Cong. PJ Garcia usab sa iyang petition mipadayag nga ang gobernador maoy adunay katungod sa pagpili sa mamahimong sakop sa board sa pribadong sector sa MCIAA.

Ang lakang sa kagamhanang lokal sa dakbayan sa Lapulapu miani kini og suporta gikan sa kanhing general manager sa MCIAA nga si manlalaban Alfonso Allere. (BANAT NEWS)