Way lisensya nakadasmag

CEBU, Philippines -   Naliki ang ulo sa usa ka 44-anyos nga lalaki ug naangol usab ang drayber nga nakadasmag niya daplin sa karsada sa Poblacion lungsod sa Alcantara niadtong Miyerkules sa alas 9:15 sa gabii.

Ang biktima mao si Rey Cabalug, 44, molupyo sa barangay Polo Alcantara samtang ang drayber sa motorsiklo nga kolor puwa ug blue dunay plaka nga 4414-GM mao si Alvin Cunocuno Osabel, 19, taga barangay Candabong ug nasuta nga way lisensiya.

Matud ni PO2 Nestor Tonilon sa Alcantara Police Station dihang nahinabi sa Banat News paingon si Osabel sa lungsod sa Ronda nga kusog kaayo ang dagan sa motor.

Pag-abot sa kurbadahon nasungag niini ang naglakaw nga si Cabalug hinungdan sa pagkalamba niini ug pagkasaliring ni Osabel.

Ang duha pulos gihatud sa Badian District Hospital. Si Osabel nga igo lang napangos sa bukton nakagawas dayun apan lahos na kini sa karsel. Samtang gibalhin og tambalanan ni Cabalug tungod sa katalandugon sa kahimtang niini. Nasuta usab nga way headlights ang maong motorsiklo ug gituohan nga maong wala makit-i ni Osabel ang biktima. (BANAT NEWS)