Siyam ka balay naugdaw sa Mandaue

CEBU, Philippines -  Siyam ka panimalay ang naugdaw sa sunog nga miigo kagahapon sa hapon didto sa barangay Tawason sa dakbayan sa Mandaue samtang usa ka bombero ang gitabang human naglisod sa pagginhawa tungod sa aso.

Si SFO2 Roy Garcia, imbestigador sa Mandaue City Fire Department nagkanayon nga ilang nadawat ang alarma sa sunog alas 2:25 ug ilang nakontrolar sulod lamang sa singko minutos ug gipaubos sa second alarm.

Subay sa pasiunang pakisusi ni Garcia nagsugod ang sunog diha sa ikaduhang andana sa panimalay ni Cresencio Salvador diin gituohang katol nga natumba maoy hinungdan.

Lakip sa naugdaw mao ang panimay nila ni Lolita Froilan; Gabriel Entrante; SPO1 Desamil Almido nga nadestino sa IDMB sa Cebu City Police Office (CCPO); Terry Paragoso; Pedro Avila; Dante Obiso ug laing duha nga totally burned ug partially damage.

Atol sa pagsulat ning balita wala pay nahatag ang kabomberuhan kun pila ang kinatibuk-ang danyos sanglit padayon pa silang mihimo sa imbestigasyon.

Wala hinuoy gikatahong dunay nasamdan sa mga residente atol sa sunog gawas lang ni SFO4 Isidro Aguilar nga daling gitabang sa mga sakop sa Emergency Rescue Unit Foundation human naglisod pagginhawa tungod sa aso.

Si Garcia nga nahinabi sa mga tigbalita mitug-an nga dul-an sa kinse minutos gyud una naabot ilang firetrucks diha sa fire scene tungod sa kalayo sa lugar nga nasunogan gikan sa ilang fire station ug ang kagamay sa agianan paingon sa nasunogan.

Si Salvador sa iyang bahin hugtanong mihimakak nga katol maoy hinungdan sa sunog sa iyang balay tungod kay matud pa niya imposibleng magsiga pa ang katol gikan sa gabii hangtud kagahapon sa hapon.

Nagtuo si Salvador nga electrical short circuit ang hinungdan sa pagkasunog sa iyang balay. (BANAT NEWS)