CEBU, Philippines - Tabangan sa dakbayan sa Sugbu ang empleyado niini nga nadestino sa Inayawan Sanitary Landfill kansang kamot gikaon sa bio-shredder machine nga gamiton paggaling sa mga basura niadtong milabay’ng adlaw.
Gipasalig ni Mayor Michael Rama nga tubagon sa kagamhanan sa siyudad sa Sugbo ang mga gastuhonon sa tambalanan ni Joselito Nuñez, 36.
Nagupok ang bukog sa walang bukton ni Nuñez human gikatahong aksidenteng miandar ang maong makina samtang iyaha kining gilimpyuhan.
Nagkanayon si Rama nga responsibilidad sa siyudad ang pagtabang sa biktima ug gimando na niya nga kinahanglang bansayon gyud ang mga operators sa paggamit sa nagkadaiyang makina sa maong sanitary landfill.
Matud pa ni Randy Navarro, ang pangulo sa maong sanitary landfill nga gikahinabi sa Banat News nga circuit breaker maoy ilang gidudahang gubaon tungod sa nakitang problema sa wirings sa maong makina.
Dugang pa niya nga gipawong gyud ang maong makina atol sa paglimpyo apan gumikan sa maong problema sa wirings aksidente kining miandar maong nakaon ang bukton ni Nuñez.
Kagahapon giayo na sa mga electricians ang maong mga wirings. Gihulagway niyang aksidente ra gyud ang nahitabo sanglit ang mga sakop sa sanitary landfill pulos nag-agi og training pag-operate sa mga makina sa maong pasilidad.
Gihimakak usab niya ang migawas nga balita sa usa ka pamantalaan (dili sa Banat News) nga naputol ang bukton ug nagupok ang mga bukog sa walang bukton ni Nuñez tungod kay nalisa lang kini maong gisemento (cast).
Naapil usab pagkasamad ang iyang tiil ug kasamtangang giatiman sa Cebu City Medical Center (CCMC).
Matud pang Navarro nga ini og gawas ni Nuñez sa tambalanan ibalhin kini og laing departamento sa landfill. (BANAT NEWS)