CEBU, Philippines - Nagpakitabang sa Kapitolyo ang kagamhanan sa dakbayan sa Carcar human makadawat ang grupo sa Bantay- Dagat niini og hulga gikan sa mga dagkong panagatan nga nanagat sa kadagatan sa dakbayan. Si Konsehal Robert Aleonar sa maong dakbayan kinsa maoy Chairman sa Committee on Agriculture, Fisheries and Environment pormal nga miduso sa ilang suwat sa Kapitolyo nga naghangyo kang Gobernador Gwendolyn Garcia nga madestinohan unta og mga miyembro sa anti-illegal fishing task force ang ilang kadagatan.
Gipasabot sa maong suwat ang kamahinungdanon sa maong task force nga maoy mosumpo sa mga ilegal nga mananagat nga anha managat sa kadagatan sa maong dakbayan.
Ang labing pait kay gawas nga anha managat sa maong lugar, manghulga pa gyud ang maong illegal nga mananagat ngadto sa mga otoridad sa kadagatan nga mobadlong kanila.
Nasayran gikan sa mga opisyal sa Carcar nga apektado kaayo ang panginabuhi sa mga gamay’ng mananagat sa maong lugar kun ang kadagatan nila lubgan sa mga higanteng sakyanan sa mananagat gikan sa laing lugar.
Gipakita usab sa mga opisyal sa kagamhanan sa Carcar ang ka seryoso sa ilang tinguha aron dili na makapangabuso ang mga mananagat nga mosulod sa ilang kadagatan ug manghulga pa sa mga gagmay’ng mananagat nga moreklamo batok kanila.
Gumikan niini milihok dayon si Gobernador Garcia aron kadestinohan og task force ang kadagatan sa Carcar nga langkoban sa 78th Infantry Batallion (IB) ug mga kawani sa Cebu Provincial Anti-Illegal Fishing Task Force (CPAIFTF).
Usa sa mga lugar sa kadagatan sa Carcar nga mahinungdanon kaayo mao ang anaa sa barangay Perelos nga giplanohang himoong Turtle Sanctuary gumikan sa kadaghang pawikan nga mangitlog sa maong lugar. (BANAT NEWS)