Illegal nga pangabit og kuryente dakpon

CEBU, Philippines -  Gumikan sa illegal nga pagkabit sa kuryente, usa ka tag-iya og apartment uban sa nag-abang niini giluwatan og orden de aresto sa korte human molayas nga wala mopresentar og ebidensya batok sa ilang kasong giatubang.

Ang dakponon human kaluwati og warrant of arrest mao sila si Josephine Gonzales ug Alejo Patalinghug, pulos taga barangay Suba ning dakbayan sa Sugbo.

Ang kaso nga ilang giatubang may labot sa kalapasan nila sa RA 7832 o ang Anti-Electricity and Electric Transmission Lines/Materials Pilferage Act of 1994.

Nagsukad ang maong kaso dihang si Patalinghug kinsa nanag-iya og apartment sa dalan M. dela Concepcion sa barangay Suba ning dakbayan ug ang nag-abang niini nga si Josephine ug Arnold Gonzales, Cesaria Gallego, Noel Caraota, Ruel Montede. Ame Ferrer ug Edsel Torres nasakpan nga mikabit og kuryente gikan sa secondary line sa VECO nga walay pananghid sa kompaniya niadtong Nobiyembre 23, 2004.

Niadtong Marso 15, 2011 si Judge Sylvia Paderanga sa RTC Branch 16 kinsa maoy nag-atiman sa kaso mirekomendar sa pagpadakop kang Gonzales ug Patalinghug kinsa nag-atubang og silot nga unom ka tuig ug sa pagbayad og multa nga P20,000. Padayong gipangita sa mga otoridad ang duha kinsa nakalayas na. (BANAT NEWS)