Delivery van sa sigarilyo gitulis

CEBU, Philippines -  Kapin sa 20 mil pesos wala pay labot sa lima ka cellphone ang nasakiyo sa tulo ka mga tulisan nga mitulis sa usa ka delivery truck sa kompaniya sa sigarilyo sa barangay Arpili sa lungsod sa Balamban niadtong Martes sa alas 5:20 sa hapon.

Ang mga biktima mao ang salesman sa Fortune Tobacco Company nga si Armando Lim, 32, taga barangay Bakilid, Mandaue City, drayber nga si Jiny Mendez, 29 , taga barangay Opao siyudad sa Mandaue ug helper nga si Angelito Pacala, 24, taga Basak siyudad sa Sugbo.

Tulo ka wala mailhing mga tulisan luwan sa usa ka motorsiklo ang mga responsable kinsa daling miikyas palayo sa lugar.

Matud ni PO2 Cesar Climaco sa Balamban Police Station dihang nahinabi sa Banat News, nagdiskarga sa mga sigarilyo diha sa Tapia Store sa barangay Arpili ang mga biktima dihang nangabot ang mga tulisan.

Ang angkas nga nagsuot og ski mask ug armadong pusil kalit nga miduol kang Lim ug mideklarar og tulis ug gikuha ang iyang bag nga gisudlan sa ilang koleksyon nga moabot og P20 mil.

Hasta ang mga cellphone sa mga biktima gidaginot og kuha sa mga tulisan una pa misibat pahilayo sakay sa ilang motorsiklo hinungdan nga midangop nalang sila sa kapolisan. (EIM) (BANAT NEWS)