Tulo ka sunog miigo sa Sugbu

CEBU, Philippines -  Tulo ka sunog ang mitumaw kagahapong adlawa sa managlahi nga oras ug lugar sa Sugbo, usa niini tinuyo

Naalarma ang mga molupyo sitio Greenside sa barangay Hipodromo ning dakbayan human miulbo ang sunog sa panimalay ni Felicisima Carbonquillo alas-4 sa kaadlawon kagahapon.

Si Felicisima ug iyang bana wala diha apan ang anak nga si Ailiene ug mga apo ray nahibilin dihang miulbo ang kalayo sa usa sa tulo ka mga lawak sa ikaduhang andana sa maong panimalay.

Ang mga residente daling mitabang sa paghakot og tubig gamit ang mga balde ug nagtinabangay og bubo sa maong lawak apan gumikan sa kainit sa panahon padayon ang pagdako hangtud nga gilamoy ang tibuok second floor. Nalangay ang kabomberuhan sa pagresponde gumikan sa mga tent nga gitukod diha sa kadalanan tungod sa gihaya nga minatay ug dihang mi-divert sila sa laing agianan nabara na usab sila sa mga nag-double park nga mga sakyanan.

Gawas sa panimalay sa mga Carbonquillo nakan-an usab sa kalayo ang kasikbit niining duha pa ka mga panimalay. Mapasalamaton ang mga residente sa firewall sa mga Carbonquillo maong wala dayon makabalhin sa sikbit nga balay ang sunog ug ingon man ang kahinay sa hangin niadtong orasa.

Nakontrolar sa mga bombero ang sunog gikan sa ilang pag-abot sulod lang sa 5-minutos. Miabot sa 13 ka mga fire trucks ang miresponde sa maong alarma nga giisa sa second alarm ug gibana-banang P15 mil ang danyos.

Ang kapitan sa maong barangay Patronillo Fat, buot nga makigdiyalogo sa mga nanag-iya og mga sakyanan sa iyang barangay gumikan sa night parking human moreklamo si City Fire Marshal Anderson Comar.

Nagplano si Fat nga duolon si Mayor Michael Rama aron ipatuman og balik ang towing ordinance sa ilang lugar.

Pasado ala-una sa hapon kagahapon duha ka balay ang naugdaw sa Seaweeds barangay Pusok syudad sa Lapu-lapu apan nakontrolar dayon sulod sa lima ka minutos.

Sa pakighinabi sa Banat News ni FO1 Climaco Acsalisid, sa Lapulapu Bureau of Fire Protection , miabot sa P350 mil ang danyos sa mga balay sa retiradong opisyal sa Philippine Air Force nga si Col. Oscar Cornelio ug ang panimalay sa iyang bayaw nga si Mario Intong.

Midugang si Acsalisid nga base sa ilang nakuhang impormasyon ang sunog nagsugod sa panimalay ni Cornelio sa ikaduhang andana niini tungod usab sa electrical short circuit. Lakip sa nasunog ang usa ka sakyanan.

Samtang gidakop si Marvin Lito Arrogancia, 23, sa Luyang, San Remegio niadtong Martes sa buntag human pasanginling mituyo og sunog sa giabangang balay sa iyang kabanay nga mipalayas kaniya niadtong Lunes sa alas 10:00 sa gabii.

Si PO3 Mamerto Gastador sa San Remegio Police Station mibutyag nga gipalayas ang suspek tungod sa pagsige niini’g panghasi kun mahubog sa paryenteng si Elia Pangan.

Apan nasuko kini ug mibalik ug giduslitan ang balay ni Pangan. (BANAT NEWS)