CEBU, Philippines - Hayan dili na magdugay, masaksihan na sa mga Sugbuanon ang hingpit nga pagpatahom sa dalan Osmeña Boulevard gikan sa Fuente Rotunda paatubang sa Cebu Provincial Capitol.
Kini ang gipadayag sa mga opisyales sa Cebu Beautification Movement Foundation Inc. (CBMFI) sa ilang panagtagbo sa unang higayon uban ni Gobernadora Gwendolyn Garcia sa miaging adlaw didto sa buhatan sa gobernador sa Kapitolyo.
Mitambong atol sa maong tigum ang presidente sa nahisgutang foundation nga si Mariquita Salimbangon Yeung ug uban pang mga opisyales.
Gani si Garcia mibutyag usab nga pabutangan niya og mga block ang sidewalk atubangan sa Cebu Provincial Capitol aron motahom ug monindot pa gayud kini.
Hinuon padayon pang nagtigum og kuwarta ang CBMFI alang sa maong proyekto.
Ang nahisgutang proyekto tipik sa Osmeña Boulevard Restoration Project nga gilusad sa miaging semana uban sa tema nga Beauty Cebu Unity Walk nga gisalmutan ni Cebu City Mayor Michael Rama, Gobernador Garcia ug ni Yeung. (BANAT NEWS)