Mga computer sa City Hall gi-lock

CEBU, Philippines - Si Konsehal Roberto Cabarrubias mibutyag nga gipa-lock na ang mga computer unit sa Cebu City Hall aron santaon ang mga trabahante gikan sa pagsil-ing sa mga nagkadaiyang social networking site.

Sumala pa sa konsehal nga makatabang ang maong lakang aron ang mga empleyado makatarong sa ilang tagsa-tagsa ka mga trabaho.

Nagkanayon si Cabarrubias nga aduna siya’y nabantayan kaniadto nga mga empleyado nga magpunay lang og sil-ing sa ilang Facebook ug uban pang social networking site sa oras nga tingtrabaho, hinungdan nga dili na magkadimao ang ilang trabaho.

“Uso man kaayo ang Facebook (FB) , unya dili man malikayan nga ang mga tawo mo-open gyud ana, ang resulta, malangan na sila sa ilang mga trabaho. Busa kinahanglan nga i-lock na lang gyud,” nagkanayon ang konsehal.

Aminado hinuon ang konsehal nga dunay ubang empleyado nga maka-sil-ing gihapon sa social networking site panahon sa tingtrabaho kay magdala man sila kini og kaugalingong laptop. (BANAT NEWS)