Tindahang way permit gi-warningan

CEBU, Philippines - Hangtod ning higayona may 4,000 pa ka mga balay patigayon ning dakbayan sa Sugbo nga wala magpa-renew sa ilang business permit.

Gumikan niini gipasidan-an ni Mayor Michael Rama ang mga tagdumala sa mga establisemento nga wala pa ka renew sa ilang lisensya sa pagtuman na sa balaod

Tungod kay nasayran sa mayor nga daghan pang nagpadayon sa ilang negosyo bisan walay business permit, iyang gimandoan ang buhatan sa tresurera sa syudad sa   paghimo og lakang   batok sa mga malapason sa balaod.

Matud pa sa mayor nga una ipahamtang ang silot sutaon una kun unsay mga kakulian nganong wala   magpa-renew sa ilang lisensya ang mga hingtungdan.

Sumala pa sa mayor, nga dili man kinahanglang sirad-an dayon ang wala magpa-renew sa permiso, apan sa higayong mamaligya sila og illegal nga mga butang mapugos gyud ang kagamhanan sa pagpatak-op kanila ug sa pagpasaka og kaso batok sa tag-iya. (BANAT NEWS)