Minero giatsa, mata napisok

CEBU, Philippines - Napisok ang walang mata sa usa ka minero human kini atsaha sa laing minero nga iyang gikaaway didto sa Seri Mining sa bukirang bahin sa barangay Dungga ,siyudad sa Danao sa miaging kaadlawon.

Ang biktima mao si Erlito Ramos, 36, minyo, minero sa Seri Mining ug nagpuyo sa nahisgutang lugar, samtang ang suspek mao ra usab ang iyang kaubang minero nga si Chito Rome, hingkod, nga silingan sa biktima.

Si SPO3 Arestio Espina sa Danao City Police mibutyag sa Banat News nga ang biktima ug   ang suspek nagkuyog nga naglakaw sulod sa compound sa minahan niadtong higayuna.

Apan matud pa ang duha nagkalalis bahin sa ilang trabaho nga misangko sa paghinagitay.

Ang suspek nga puwerting sukoa, nakakita og atsa ug walay langan-langan gibugha dayon ang biktima.

Ang biktima nga anad na kaayo og panagang, gigamit niini ang bukton aron nga dili masabak ang iyang lawas sa hait kaayong suwab sa atsa hinungdan nga samdan ang iyang walang bukton.

 Apan sa ikaduhang bunal sa atsa, wala na mapiog sa bukton nga samdan ug didto na motugpa ang suwab sa atsa sa walang mata sa biktima busa napisok kini.

Nakahunahuna ang suspetsado nga di niya tiwason ang biktima ug misibat nalang kini pahilayo sa maong dapit ug gibiyaan nga naligo sa dugo ang biktima. (WC)(BANAT NEWS)