CEBU, Philippines - Hatagan og pasidungog ang kapulisan sa dakbayan sa Talisay nga nakasikop sa duha ka tulisang mitulis sa balay ni board member Julian Daan alyas ‘Esteban Escudero’ niadtong Lunes sa buntag diin nadala ang kapin usa ka milyon nga bili sa mga alahas.
Si Sr. Supt. Patrocinio Comendador pangulo sa kapulisan sa probinsya nga nahinabi sa mga tigbalita nagkanayon nga karung buntaga iyang adtuon ang Talisay City Police Station aron iyang hatagan og pasidungog ang kapulisan.
Si Comendador miingon nga si PRO-7 Chief Supt. Ager Ontog Jr. mimando kaniya nga pahatagan og ‘commendation’ ang mga pulis nga naglangkob sa operasyon pagsikop nilang Julius Racaza ug Ramsey Abatayo.
Matud niya nga human sa tulis duna dayon silay nakuhang lead sanglit ang usa sa katabang nakamay-ong man sa suspetsado.
Gihulagway ni Comendador nga sulbad na ang kaso ni Daan apan magpadayon ang imbestigasyon may labot sa alegasyon nga dugay’ng nakaresponde ang kapulisan niadtong Lunes.
Apan si Yolly, ang kapikas ni Daan kagahapon nangayo og pasaylo sa kapolisan tungod sa iyang reaksyon kabahin sa walay mitubag sa iyang tawag human siya pasabtang naputol na ang linya sa numerong iyang gitawgan. (BANAT NEWS)