Usa sa mitulis ni Teban paryente ra

CEBU, Philippines - Usa sa duha ka giingong mitulis kang Board Member Julian Bacus Daan a.k.a. Esteban Escudero giingong kabanay ra niini.

Si Chief Insp. Eddie Recamara, officer-in-charge sa Talisay City Police Station mibutyag nga ang mga nasikop mao sila si Ramses Abatayo, 29, taga sitio Sangi, barangay Tabunok, Talisay ug Julius Racaza, 34, taga sitio Iba, barangay Lagtang, Talisay.

Ang duha nasikop kagahapon sayo sa buntag sa gipahigayong hot-pursuit operation sa kapolisan sa dakbayan sa Talisay ug pipila sa mga alahas nga ilang nadala nauli.

Si Abatayo nasikop mga alas 5:00 sa buntag kagahapon diha sa balay sa iyang kapuyo sa barangay Basak, Mambaling, dakbayan sa Sugbo ug si Racaza nasikop diha sa iyang balay sa sitio Iba sa barangay Lagtang mga alas 6:00 na sa buntag.

Matud ni Recamara nga si Abatayo gikatakdang pasakaan nila og kasong robbery with forced intimidation apan si Racaza ipaubos pa nila kini sa lawom mga imbestigasyon sa kalambigitan niya sa hitabo.

Ang mga alahas nabawi sa mga polis diha sa posisyon ni Abatayo lakip na ang resibo sa white gold nga kwintas nga giprenda niini og kapin sa P9,000.

Gibutyag usab ni Recamara nga dunay mga saksi sa nahitabong tulis diha sa balay ni Daan.

Ang operatiba nga misikop sa duha gilangkuban nila ni Insp. Hugo Rio Ipon, Insp. Ricardo Echavez, PO3 Rey Bucao, PO3 Benedicto Lasque, PO3 Mikie Espina ug PO2 Roy Lofranco.

Si Ipong nga nahinabi sa mga tigbalita kagahapon nagkanayon nga duna silay nahipos nga mga report nga si Abatayo ug Racaza nalambigit og mga pagpanulis apan una pa kining higayon nga nasikop ang duha. Matud usab ni Ipong nga dunay nakakita kang Racaza nga nagbarog-barog diha sa gawas sa gate sa balay ni Daan niadtong Domingo sa gabii ug nianang Lunes sa buntag dunay nakakita sa duha nga misulod sa balay sa biktima nga nagpurong sa ulo ug paggawas nila wala na magpurong.

Si Yolly Daan kagahapon dihang nakita ang duha nadala kini sa iyang emosyon tungod sa kabalaka nga posibleng atakehon sa sakit sa kasing-kasing ang iyang bana dihang gitiunan og kutsilyo ni Abatayo.

Si Abatayo miangkon nga nag-Tagalog siya dihang iyang gilayog ang li-og ni Daan ug gitionan og kutsilyo ug gisultihan si Daan nga “kailangan ko nang pera tapos ‘yung kasamahan ko nasa labas naghihintay, patawad na lang sa aking ginawa, Board ka kaya meron ka talagang pera.” Gibana-banang sobra sa P1 milyon ang kantidad sa maong mga alahas. Wala mauli ang relo nga Rado ni Daan ug white gold nga Omega choker sa iyang asawa nga nagkantidad tanan og P50 mil.

Si Abatayo dihang nahinabi sa Banat News miangkon nga ubos sila sa impluwensiya sa ginadiling drugas dihang misulod sila sa balay ni Daan apan matud niya nga daghan siyang utang nga balayranan human nga nahunong ang ilang pagpanahi og mga kalo maong nakahuna-huna sila og panulis.

Apan si Racaza hugtanon nga mihimakak sa pangangkon ni Abatayo nga miapil siya sa pagpanulis.

Si Racaza nangangkong paryente sa inahan si Daan sa habig sa mga Bacus. (BANAT NEWS)