Priso nga mitigbas sa kapuyo namatay

CEBU, Philippines - Patay nang nadiskubrehan ang usa ka piniriso diha sa gihigdaan niini sulod sa karsel sa Toledo City Police Station niadtong Domingo sa buntag.

Ang piniriso nga napalgang patay mao si Maximo Mahilum Benting, 49, molupyo sa barangay Cabito-onan Toledo City.

Matud ni SPO3 Carmilito Hornales, desk officer sa Toledo City Police dihang nahinabi sa Banat News subay sa ilang imbestigasyon ang maong piniriso gisusi pa niya sa iyang pag-duty nianang pagka alas 8:00 sa buntag ug nahinanok pa kini sa pagkatulog kauban ang lain pang tulo ka piniriso sud sa karsel.

Pagka alas 9:00 pasado sa buntag naatol nga miduaw ang 14-anyos nga anak babaye ni Benting ug naghatud unta sa pamahaw hinungdan nga gipukaw sa kauban niining piniriso apan wala na molihok pa si Mahilum hinungdan nga daling gipahibawo ang mga polis.

Dali silang mitawag og ambulansiya ug gipahatud dayun kini sa Toledo City District Hospital apan gideklarar kini nga dead on arrival.

Matud ni Hornales si Benting nabalhog sa bilanggoan niadtong Biyernes sa alas 3:30 sa hapon human kini gidakop tungod sa pagpanigbas sa kapuyo niini ug kagahapong adlawa gitakda na unta kining pasakaan og kaso.

Si Hornales gitug-anan sa 14-anyos nga dalagitang anak ni Benting nga nianang pagka Sabado sa gabii misulti nang daan ang amahan nga posibleng mao na kadto ang katapusan nilang panagkita.