CEBU, Philippines - Nagpabilin pang wala hiilhi ang patay’ng lawas sa usa ka lalaki nga nahagbong gikan sa gutter sa ibabaw nga bahin sa Marcelo Fernan Bridge sa barangay Pusok, dakbayan sa Lapulapu sa miaging adlaw.
Si PO2 John Carlo Jocotan nga nahinabi sa Banat News miingon nga giugkat sa kadagatan sa Mactan Channel ang maong lalaki nga patay na.
Ang maong lalaki nga nagsul-ob og short pants ug t-shirt, gibanabanang anaa sa 30 anyos kapin kun kulang ang panuigon ug kasarangan lamang ang gidak-on sa lawas niini.
Dugang pa ni PO2 Jocotan nga subay sa ilang nahipos nga kasayoran gikan sa mga nakasaksi nga sa sayo pa mura og hubog ang maong tawo nga naglingkod sa gutter sa tulay ug kalit lang nahagbong.
Ang mga sakop sa Maritime Police ug Philippine Coast Guard nga gipahibalo sa pipila ka residente maoy daling misusi sa hitabo ug mao usab miugkat sa patay’ng lawas sa biktima nga naglutaw na sa dagat.
Si PO2 Jocotan miingon nga kasamtangang gipahiluna ang patay’ng lawas sa maong lalaki sa Rolling Hills sa Banilad, sa dakbayan sa Mandaue ug ilang gipaabot ang mga kabanay nga maoy moila niini. (WC) - BANAT NEWS