Bokal daan gitulis

CEBU, Philippines - Gitulis sa nag-inusarang tulisan diha mismo sa iyang balay si Board Member Julian “Teban” Daan kagahapon sa alas 9:50 sa buntag diha sa Palmview Village sa barangay Tabunok siyudad sa Talisay.

Nadala sa tulisan ang gibana-banang P1.2 milyon nga kantidad sa alahas ug P300 cash.

Si Daan mitug-an sa kapulisan nga nag-type siya sa typewriter niadtong tungora sa dihang kalit lang siya gilayog sa liog ug gitionan og kutsilyo sa nag-inusarang tulisan.

Sa sinugdanan nagtuo si Daan nga dunay tawo nga nangomedya ngadto kaniya apan iyang nabantayan nga seryoso ang tawong milayog sa iyang liog.

Giingong nagtabon kini sa iyang nawong gamit ang panapton apan iyang nabantayan nga dako kini og mata ug slim-built.

Matud pa niya nga iyaha kining gihangyo nga buhian lang siya ug iyang gitanyagan nga itugyan niya ang mga alahas ug cash ug gikuyogan ang wala mailhing tulisan ngadto sa ilang master’s bedroom diin nahimutang ang mga alahas sa iyang asawang si Yolly nga gitagoan sa ilang cabinet.

Matud ni Daan nga gipagguba niya sa iyang katabang ang lock sa cabinet sanglit wala may yawe niadtong higayona

Si Daan ug iyang katabang gibilin sa kuwarto ug gisirad-an sa tulisan sa pag-ikyas niini.

Si Daan dihang gikahinabi sa programang Okryan sa DyRC kagahapon nagkanayon nga wala dayon motuo ang tulisan nga P300 ra ang iyang kwarta tungod kay usa siya ka board member.

“Dako og mata, nangayo siya og kwarta unya P300 ra man akong kwarta giingnan ko niya nga di siya motuo kay board member ko. Akong gihatag akong singsing ug alahas unya gilungkab ang jewelry box sa akong asawa,” matud pang Bokal sa interbyu sa Okryan.

Si Daan nga nabantog sa pangalang Esteban Escudero sa iyang mga komedyang programa sa radyo kaniadto ug maoy tagsuwat sa Sitcom ni Teban niining pamantalaan nagkanayon nga iyang gihatag ang iyang kabtangan bugti nga di pasipad-an. “Bisa’g unsa nga mahatag nako basta di lang ko dunggabon..hasta’g mamatay ko wala nay Teban…” pangomedya pa niini.

Subay sa pasiunang pakisusi sa kapulisan ang tulisan milayat sa koral sa balay ni Daan sanglit walay nakita nga forced entry sa main door bisan paman kun wala kini i-lock.

Sa iyang bahin, si Chief Inspector Eddie Recamara, hepe sa kapulisan sa dakbayan sa Talisay nagkanayon nga posibleng ang tulisan nagpaabot nga mag-inusara sa ilang balay si Daan uban sa iyang katabang.

Ang tulisan gibana-banang dunay gitas-ong 5’5” ug mag-tinagalog ang sinultihan apan dili kaayo larino nga manulti sa maong pinulongan.

Sa iyang bahin, si Yolly mipasangil sa kapulisan sa kalangay nga miresponde sa maong alarma sa tulis. Matud niya nga iya pang gitawgan ang telepono sa police station 272-3636 apan wala gyud dayon kini tubaga sa kapulisan.

Samtang si Gob. Gwendolyn Garcia pagkasayod sa nahitabo kang Daan miingon nga kinahanglang hatagan og police security detail ang maong opisyal. “Certainly we will extend whatever assistance we can to PB Teban Daan we shall discuss this with the PNP and see how we could possibly help him in so far as the security aspect is concern,” sigon pa ni Garcia. (Ug Liv Campo sa TF/EIM)   - BANAT NEWS