CEBU, Philippines - Duha ka tawo ang namatay sa duha ka binuwag nga hitabo sa pagpamusil sa managlahing lugar ning dakbayan sa Sugbo sa miaging Domingo.
Ang unang biktima mao si Henry Bacalso, 38, kinsa gipusil didto sa General Gines St. barangay Pasil sa alas 2:00 sa hapon ug gisunod usab si Ronald Espina, 45, didto sa barangay San Roque sa sayong kagabhion. Ang suspetsadong miluthang kang Bacalso giila nga si Melvin Capilitan, 25, sumala pa ni Josephine Arnaiz, kapuyo sa biktima.
Wala hidakpi sa kapolisan human mosibat.
Sa pasiunang imbestigasyon sa Homicide Section sa Cebu City Police Office (CCPO) nagbutyag nga ang biktima uban sa iyang kapuyo naglingkod sa lantay sa naasoy’ng lugar.
Giingong kalit lang miduol ang suspetsado ug sa walay igong hinungdan gipusil ang ulo sa biktima ug namatay kini diha-diha dayon.
Human sa lima ka oras nga nakalabay laing gipusil patay mao si Ronald Espina, 45, didto sa dalan Plaridel sa barangay Ermita. Ang biktima nga taga barangay San Roque ning dakbayan kuyog sa usa ka babaye kay mamalit og utanon dihang kalit lang miduol ang suspetsado nga si Fernando Cuervo, usa ka tanod kanhi sa Ermita.
Migunit kini sa abaga sa biktima unya human moingon nga “ikaw diay ni bai” gisagpa dayon ang biktima, ug si Anthony Cabarrubias nga kauban ni Cuervo maoy mipusil patay sa biktima.
Si Cuervo nadakpan dayon sa kapolisan samtang si Cabarrubias padayon pang gipangita human kini mosibat. (WC) (BANATNEWS)