27 ka barangay hatagan og hinabang

CEBU, Philippines - Nakadawat og pinansiyal nga hinabang ang unom sa 27 ka barangay sa dakbayan sa Mandaue gikan sa buhatan ni Board Member Arleigh Sitoy sa ikaunom nga distrito sa lalawigan sa Sugbo.

Ang maong mga barangay nga nakadawat sa maong hinabang pinansiyal gikan kang Sitoy mao ang Subangdaku, Tingub, Cubacub, bakilid, Casuntingan ug Tipolo.

Gihimo sa buhatan ni Mayor Jonas Cortes niadtong miaging adlaw ang pagtunol sa pinansiyal nga tabang sa maong mga barangay alang sa pagpatuman sa mga proyekto sa mga barangay opisyal nga mahaum usab sa panginahanglan sa matag barangay.

Hinuon di parehas ang kantidad nga gitunol ni Sitoy sanglit managlahi man ang gikinahanglan sa matag usa.

Nakadawat og P50, 000 ang Subangdaku, P60,000 alang sa barangay Tingob, P50,000 sa barangay Cubacub, P60,000 alang sa barangay Bakilid, P60,000 Casuntingan, ug P20,000 usab alang sa barangay Tipolo.

Gitunol ang maong kantidad diha sa buhatan ni Cortes.   - BANAT NEWS