Snatcher natiklo

CEBU, Philippines - Usa ka snatcher kinsa sa iyang paglabni og bag naatlan sa nagpatrolya nga mga polis nasikop ug mikagulkol dayon sa prisohan   sa dakbayan sa Toledo sa miaging hapon.

Ang suspetsado nailhan nga si Romecito Dejeno Horboda, 24, ulitawo nga taga barangay Cabitoonan, dakbayan sa Toledo, samtang ang biktima mao si Carolina Cambarijan Oliverio, hingkod, biyuda nga taga barangay Tubod sa mao gihapong dakbayan.

Si SPO3 Carmilito Hornales, desk officer sa Toledo City Police dihang nahinabi sa Banat News mibutyag nga naglakaw sa karsada ang biktima dihang kalit lang gisakdapan sa suspek ug gilabni   ang bag niini nga may sulod nga P600 nga kuwarta.

Human malabni ang bag, diha-diha misirit og dagan ang suspetsado paingon sa merkado publiko sa maong dapit.

Apan ang singgit sa biktima nga nangayo og panabang nadunggan sa kapolisan nga nagpatrolya niadtong tungora.

Dihang nakita sa mga otoridad nga nagdagan paingon sa merkado ang   suspetsado giatangan dayon nila kini ug dihang na-corner na kini napugos sa pagtahan sa iyang kaugalingon ngadto sa mga tinugyanan sa balaod.

Nabawi sa kapolisan ang bag ug ang P600 nga sulod niini ug ang suspek nagpahayahay na karon sa prisohan human kapasakai og kiha sa biktima.  - BANAT NEWS