CEBU, Philippines - Usa ka opisyal sa departamento sa agrikultura sa United Nations miduaw sa buhatan ni Gobernador Gwendolyn Garcia ug nagpahibawo kalabot sa gitakdang panagtagbo sa mga delegado sa Asia ug Pacific region dinhi sa Sugbo sa umaabot nga Nobiyembre.
Matud pa ni Dr. Visno Songquite ang Food and Agriculture Chief sa United Nation nga anhi nila himoa ang ilang Annual Session of the Animal Production and Health Commission for Asia and Pacific Region nga tambungan sa tanang mga opisyal sa agrikultura sa nagkalainlaing rehiyon sa Asia.
Sa pagkakaron namili pa sila og lugar nga kapahigayonan sa usa ka dakong kalihokan dinhi.
Gibutyag ni Songquite nga ang mga delegado gikan sa nagkalainlaing nasud sa Asia maoy mipili sa Cebu nga ilang pahigayonan sa maong komperensya pinaagi sa botasyon nga ilang gihimo.
Midugang siya nga nahigam ang ubang mga delegado kay nakasinati na sila sa maayong moabi-abi sa kagamhanan ning lalawigan sa mga turista nga moduaw nganhi busa mayoridad sa mga delegado gustong mobalik nganhi, matud pa ni Songquite.
Usa sa nakalingaw kanila mao ang madanihon kaayong cultural ug indigenous presentation nga gipasundayag sa Kapitolyo niadtong mga higayon nga nakatambong sila og international conference dinhi. - BANAT NEWS