Panday naghikog sulod sa barko

CEBU, Philippines - Usa ka panday nga gikan sa Mindoro naghikog sulod sa MV Asia Philippines nga gisakyan niini ug patay na kining midunggo sa Pier 5 ning dakbayan kagahapon sa buntag.

Si Ricardo Asucan, 55, minyo, giila nga panday sa Du-Ek Sam Enterprises sa Occidental Mindoro, apan lumad kini nga taga sitio Estaca, lungsod sa Dagohoy, Bohol.

Sumala sa kapolisan nga usa ka utility worker sa barko maoy nakadiskobre kang Asucan nga wala nay kinabuhi sulod sa comfort room sa barko nga nagluhod, samtang gihiktan og sweat shirt ang iyang liog.

Ang iyang ugangan nga si Nelson Baquilid Suarez uban kang Losantos Bentulan Busalan nagpaabot kaniya sa pantalan aron dad-on siya ngadto sa Bohol, dihang mao nalay ilang nasayran nga patay na ang ilang gihuwat.

Wala pa hisayri ang hinungdan sa paghikog niini, apan nasuta sa mga otoridad nga walay foul play ang kamatayon ni Asucan.  - BANAT NEWS