Hamtong punoan sa marijuana gilarot

CEBU, Philippines - Mikabat sa 300 kapin ka mga punoan sa hamtong nang marijuana ang nalarot sa hiniusang team sa kapolisan ug kasundaluhan sa 78th IB sa Philippine Army didto sa sitio Katagdaan barangay Liboron, lungsod sa Carmen sa miaging buntag.

Si SPO2 Simplicio Gibo sa Carmen Police Station miingon nga ang plantasyon sa marijuana didto mahimutang sa ilawom sa kakahoyan sa sitio Katagdaan.

Ang grupo sa kapolisan gipangunahan ni Insp. Edgar P. Awe, samtang ang mga sundawo gipangunahan usab ni 2nd Lt. Argie S. Garin.

Ang mga otoridad sa sayo pa nakadawat og pahibawo gikan sa mga nagpakabana nga molupyo kalabot sa maong plantasyon sa ginadiling tanom.  

Ang plantasyon nga nalarotan og 346 ka punoan sa hamtong nang marijuana gilibotan sa mga kakahoyan ug walay natumbok nga tag-iya sa maong mga tanom.

Ang maong mga nalarot nga marijuana anaa ipundo karon sa compound sa Carmen Police Station ug nagpaabot nalang sa tukmang petsa sa pagdaob niini.  - BANAT NEWS

Show comments