Ulitawo girapido'g bala patay

CEBU, Philippines - Nakabsan diha-diha sa kinabuhi ang usa ka ulitawo kinsa gipauwanan og mga bala sa giingong kapostahanay niya sa billiard didto sa barangay Talaga, lungsod sa Argao kagahapon sa kaadlawon.

Ang biktima kinsa didto sa pultahan sa ilang balay rapidoha sa mga bala sa .45 kalibreng pistola mao si Nikki Sawey Cañete, molupyo sa maong lugar, samtang ang kriminal kansang ngalan wala ibutyag sa kapolisan giingong nag-atang nang daan sa biktima sa karsada nga agi-anan niini.

Sa pakighinabi sa Banat News ni PO2 Benjamin Gerozaga, sa Argao Police Station nasayran nga ang biktima nagpaingon na sa ilang balay gikan sa disko nga gitambongan niini sa barangay Biasong nga nagpista niadtong Sabado.

Apan wala lang damha sa biktima nga gisundan diay siya sa kriminal ug pag-abot niya sa ilang balay nanuktok siya sa ilang pultahan apan wala na siya makasulod dihang girapido siya sa mga bala sa armas sa kriminal.

Gani ablihan na unta ang biktima sa manghod niining si Chyle, apan dihang mipaka na ang buto-buto sa mga armas gisirhan og balik niini ang pultahan aron dili siya mapagan.

Ang biktima kansang kalawasan nabulit sa mga samad sa bala wala na makaabot nga buhi sa tambalanan.

Sa dapit nga nahitaboan nakapunit ang kapolisan og unom ka kabhang sa mga bala sa .45 kalibreng pistola.

Sa pakighinabi sa Banat News kang Chief Insp. Alejandro Batubalonos, hepe sa Argao Police Station nga sa ilang gihimong imbestigasyon ilang nasayran nga sa sayo pa, nagduwa og billiard ang biktima ug ang kriminal apan nagkalalis kini kay wala magkasinabot sa ilang posta.

Apan ang biktima giingong wala lang nanumbaling sa maong lalis kay nagtuo siya nga kalimtan ra kini sa iyang gikalalis.

Matud pa ni Batubalonos nga sa pagkakaron wala nila ibutyag ang ngalan sa kriminal kay gipaabot pa nila ang dugang mga ebidensya nga magpamatuod nga mao gyud kini mipatay sa biktima, ilabi na nga wala ra bay nakaklaro kaayo sa hitsura sa kriminal kinsa giingong nagsakay og motorsiklo sa pag-ikyas niini.

Apan nagtuo ni Batubalonos nga dili lang ang bahin sa gikalalisang posta sa billiard maoy hinungdan sa maong pagpamusil kundili may pagduda pa sila nga mas labaw pang bug-at nga butang nga gikasuk-an sa kriminal gumikan   kay ang pagpatay niini sa biktima sobra ra kaayo ka grabi nga nagpasabot sa naghinobrang kapungot ug kalagot niini ngadto sa biktima.

Sa pagkakaron gipalawman pa sa kapolisan ang pagsuta sa hinungdan ug motibo sa maong krimen samtang padayon pa usab nilang gipangita ang kriminal.   - BANAT NEWS