EASCO may bag-ong ngalan

CEBU, Philippines -  Ang Eastern Assurance and Surety Corporation (EASCO) usa ka kompaniya nga nag-alagad isip non- life insurance o pasiguro sa mga kabtangan sa publiko sa pagka-karon may bag-o nang ngalan nga mao ang Milestone Guaranty and Assurance Corporation.

Si Marichu E. Balderama, Branch Manager sa EASCO sa Kabisay-an nagkanayon nga ang pagbag-o sa ngalan sa kompaniya nahimo niadtong Disyembre 2010 pa, human lig-ona sa Securities and Exchange Commission (SEC) ang aplikasyon niini.

Matud pa ni Balderama nga subay sa memorandum nga iyang nadawat dili pa dugay nga pirmado sa Vice President for Operations Vergel J. Javier sa EASCO, nasayran nga ang pagbag-o sa ngalan sa kompaniya gihimo gumikan sa daghang mga katarungan.

Usa niini mao ang gidugayon na sa pangalagad niini sa natad sa pamatigayon sa pasiguro nga non-life diin taliwala sa kadaghan sa iyang mga kakompetensya nagpadayon kini sa pag-uswag sa iyang kalamposan sukad pa niadtong l962 ug hangtod karong milanat na kini sa iyang ika-49 ka tuig nga pangalagad sa publiko, busa gipili ang ngalang MILESTONE.

Miingon si Balderama nga gumikan sa kahamtong na sa kompaniya diin namatud-an ang dili hitupngan nga pangalagad niini ngadto sa publiko ug sa samang higayon ang kalig-on sa pagsalig sa katawhan sa kompaniya, wala magduha-duha ang mga negosyanteng nagpadagan ug nanag-iya niini sa pagbubo pa og dugang puhonan aron pinaagi sa bag-ong ngalan niini labi pang makahatag sa iyang kasilinganang serbisyo ngadto sa mga molupyo.

Gumikan sa gipadak-ang puhonan, labi pang gipasalig sa mga kapitalista sa Milestone Guaranty and Assurance Corporation ang kalig-on, kasaligang serbisyo, ang makatarunganong pagpanubag sa iyang responsibilidad ngadto sa nagpasiguro aron labi pang molambo labaw pa sa mga kalamposang nakab-ot niini sa tanang mga katuigang nanglabay sukad sa iyang pagkahimugso ug hangtod na sa mga umaabot pang henerasyon. (BANAT NEWS)