Gipusil sa silingan angol

CEBU, Philippines -  Samdan sa bukton ang usa ka lalaki human kini pusila sa iyang silingan   didto sa   sitio Panaghiusa, barangay T. Padilla, dakbayan sa Sugbo sa miaging kaadlawon.

Ang biktima nailhan nga si Juvil Feletaria Gacrama, 16, nga molupyo sa maong lugar, samtang ang suspek nailhan usab nga si John Joe Nodalo silingan sa biktima.

Gisaysay sa biktima ngadto sa kapolisan nga nag-inom sila kauban sa iyang mga barkada sa daplin sa karsada sa ilang lugar. 

Unya kalit lang miabot ang suspek ug mga barkada usab niini ug dayon giluthang ang biktima.

Nag-iyahay og dagan ang mga barkada sa biktima sa kabalaka nga mapagan sila, ug nakahigayon usab sa pag-ikyas ang suspetsado, samtang ang biktima nahibiling nag-inusara, busa gihatod kini sa mga molupyo sa maong lugar ngadto sa Vicente Sotto Memorial Medical Center samtang padayon pang gipaabot sa kapolisan ang biktima nga mosang-at og kaso batok sa suspetsado. (BANAT NEWS)