293 Ka kaso na ang natalang adunay HIV-AIDS

CEBU, Philippines -  Gipahibalo sa City Health Office sa dakbayan sa Sugbu nga aduna nay natalang 293 ka mga kaso sa Acquired Immune Deficiency Syndrome-Human Immunodeficiency Virus (HIV-AIDS) sukad sa tuig 1989.

Si Dr. Ilya Tac-an, ang head social hygiene clinic ning dakbayan nagkanayon nga sukad niadtong bulan sa Enero hangtud ning bulana dugang 16 ka mga kaso ang natala.

Usa sa nakapaalarma niini mao nga ang napulo sa mga nataptan karon niining maong sakit nakuha tungod sa paggamit og syringes (injection) nga maoy sagad gamiton sa mga tiggamitan og ilegal nga drugas, samtang ang unom mga sex workers.

Ang City Health Office nakatala og 182 ka mga kaso niini sa milabay’ng tuig.

Dugang pa ni Tac-an ang labing bata nga nataptan nag-edad og 15-anyos nga usa ka batang lalaking aktibo sa pakighilawas (sexually active) ug tiggamitan usab og injectable drugs.

Si Dr. Abelardo Alera, head HIV/AIDS core team sa Vicente Sotto Memorial Medical Center (VSMMC) mibutyag nga 90 porsiyento sa mga nataptan nakuha pinaagi sa pakighilawas.

Samtang si Jerson See, ang presidente sa Cebu Plus kansang organisasyon mao karoy mitabang sa mga adunay susamang sakit mihangyo sa publiko nga trataron sila og patas sama sa usa ka normal nga tawo.

Matud pa niini nga nagkinahanglan sila og pagsabot ug pagrespeto gikan sa publiko

Karong adlaw’ng Domingo (Mayo 15) adunay ipahigayong 28th AIDS candlelight memorial isip paghinumdom sa mga namatay sa HIV ug AIDS nga anha himuon sa Plaza Sugbo nga magsugod alas-4 hangtud alas-7 sa gabii. (EIM) (BANAT NEWS)