Taga Turkey nalubaan didto sa Toledo

CEBU, Philippines -  Naangol ang usa ka langyaw human kini lubaa sa usa ka wala hiilhing lalaki didto   duol sa gipuy-ang apartment niini sa barangay Luray 2, dakbayan sa Toledo sa miaging gabii.

Ang biktima nga nakaangkon og samad dinunggaban sa nawong mao si George Dutches, 42, ulitawo, nga taga Turkey, apan kasamtangang nag-abang og apartment sa maong lugar .

Si SPO3 Carmilito Hornales sa Toledo City Police Station mibutyag sa Banat News nga ang biktima sa wala pa malubai, may gikalalis nga usa ka babaye nga nailang Juliane alyas Jakjak, hingkod, sa gawas sa apartment nga giabangan sa langyaw.

Apan ang kriminal nga naglingkod sa motorsiklo dili kaayo layo sa nahimutangan sa langyaw ug sa gikalalis niining si Jakjak miduol sa langyaw ug sa walay igong hinungdan gidunggab ang nawong sa biktima.

Human samdi ang biktima misibat dayon ang kriminal samtang gihatod usab dayon sa mga silingan ang biktima ngadto sa tambalanan sa Toledo.

Padayon pang gipangita sa kapolisan ang kriminal. (BANAT NEWS)