Tawong 'wanted' nasikop sa polis

CEBU, Philippines -  Usa ka “wanted” nga kriminal sulod sa tulo ka tuig gumikan sa kasong pagpatay og tulo ka tawo, sa katapusan   nagtingkagol na sa prisohan human siya masikop didto sa lungsod sa Argao, kagahapon sa alas 2:00 sa hapon.

Si Nolbert “Abet” Albarracin, 31, molupyo sa sitio Tulo-tulo, barangay Bulasa sa maong lungsod.

Sa pakighinabi sa Banat News ni Chief Inspector Alejandro Batubalonos ang hepe sa Argao Police nasayran nga ang maong “wanted” nasikop human hisayri sa kapolisan gikan sa usa ka tanod ang iyang nahimutangan.

Matud pa ni Batubalonos nga human nila madawat ang taho dali usab sila nga miadto sa lugar diin ila usab dayun nga nakit-an ang suspetsado tungod sa pista nga nahitabo sa ilang lugar.

Midugang si Batubalonos nga niadtong buwan pa sa Pebrero ning tuiga nadawat nila ang warrant of arrest nga gipirmahan ni RTC-Branch 26 Judge Maximo Perez.

Nasayran nga si Albarracin giingong nakapatay niadtong tuig 2009 sa usa ka Jojo alyas Kabayo ug misibat dayon kini ngadto sa barangay Sabang, lungsod sa Palompon, Leyte. Mibutyag usab si Batubalonos nga nasayran usab nila nga samtang nagtago-tago didto sa Leyte , si Albarracin giingong nakapatay usab kini didto og duha ka babaye.

Gitug-an usab ni Batubalunos nga si Albarracin ig-agaw usab diay ni Sammy Albarracin ang nasikop usab sa kapolisan human malutsi og warrant tungod usab sa kasong murder. (BANAT NEWS)