Libreng medical, surgical mission sa CCMC

CEBU, Philippines -  Adunay ipahigayong libreng medical and surgical mission ang usa ka grupo sa mga Filipino-American nga mga doktor diha sa Cebu City Medical Center karong Mayo 23 hangtud sa petsa 27 niini gihapong bulana.

Ang barangay kapitan sa Pook sa dakbayan sa Talisay nga si kapitan Doroteo Emit kansang barangay mao untay makabenepisyo sa maong libreng serbisyo medikal gitugutan ni Mayor Michael Rama nga anha nalang buhaton ang surgical mission sa CCMC.

Kini gumikan kay kuwang ang mga kahimanan sa dakbayan sa Talisay aron makapahigayon og opera, samtang ang free medical checkup (mission) ipahigayon usab sa nagkadaiyang barangay sa maong mga petsa.

Ang surgical mission diha sa CCMC maglakip sa pre-operation ug free check- up alang sa mga adunay thyroid problem, bungi ug sa mga adunay sakit sa pamanit. Ang grupo gilangkuban sa 27 ka-volunteers nga mga Filipino-American nga mga espesyalista, lima kanila mga surgeons ug ingon man espesyalistang gikan sa Manila ug sa Mindanao.

Giawhag sa kapitan ang mga katawhan nga moadto sa maong medical ug surgical mission tungod kay libre usab kini alang sa mga gikinahanglan pang-medikal. Mihangyo usab ang kapitan sa nagkadaiyang mga konstituwente nga mosalmot sa maong serbisyo.

Nagpasalamat si Rama kang Emit sa pakigtambayayong niini sa local government alang sa maong mission. (BANAT NEWS)