Cortes mopaluyo ni Luigi sa 2013 kun...

CEBU, Philippines -  Mipadayag og suporta si Mayor Jonas Cortes kang 6th District Congressman Luigi Quisumbing kung may plano kining magpasubli sa katungdanan sa 2013 eleksiyon aron lang kahatagan og katumanan ang paghimo sa siyudad nga lone congressional district.

Matud pang Cortes kung gikinahanglang personal siyang makigkita kang Quisumbing kabahin niini (pagka-lone district) iyaha kining buhaton tungod kay mao man kini ang gipangayo sa mga taga Mandaue.

Gitataw ni Cortes nga igo lamang niyang gisanong ang awhag sa mga Mandauehanon sanglit dugay na kaayo kining nataligam-an.

Matud pa ni Cortes nga niadto pang tuig 1992 nga nakompleto sa dakbayan ang rekisitos aron ideklarar nga lone congressional district ug naghinubra na ang gidaghanon sa populasyon sa dakbayan nga 250,000 nga maoy gilatid sa balaod sanglit kapin sa 300,000 na man ang mga molupyo niining panahona.

Si Cortes miingon nga iyang pakuyogon ang mga barangay opisyal sa dakbayan sa ilang panagtagbo ni Quisumbing.

Ang mga kapitan sa maong dakbayan una nang milusad og signature campaign sa mga molupyo alang sa maong katuyoan ug padayon pa gihapon kining gihimo.

Gipanghimakak ni Cortes nga nangambisyon kining molingkod pagka-kongresista kun mahitabo man nga ma-lone district ang Mandaue sanglit mas gihatagan niya og gibug-aton ang kaayuhang makuha sa Mandaue sa maong lakang.

Ang usa ka distrito adunay gahing P70 milyones nga pork barrel fund nga maoy gamiton sa mga proyektong himuon sa mapiling kongresista.

Daan nang misupak niini si Quisumbing sanglit mabuwag na og maayo ang lungsod sa Cordova ug Consolacion human una nang nahimong lone congressional district ang Lapulapu City nga kaniadto sakop sa 6th District. (BANAT NEWS)