Tulo na ang naghikog karong semanaha

CEBU, Philippines -  Duha ka mga tawo ang naghikog dinhi sa dakbayan sa Sugbu sa managlahing dapit, mao na kini ang ikatulong hitabo nga dunay naghikog dinhi sa lalawigan sa Sugbu.

Kagahapon sa buntag, usa ka lalaking manguhaay og ‘balas’ ang nagpakamatay ug napalgang nagbitay sa punoan sa kahoy nga ‘lumbang’ nga mitubo daplin sa sapa diha sa sitio Tres de Abril sa barangay Labangon ning siyudad.

Si Renald Pepito, 20, taga sitio Trinidad sa barangay Punta Princesa napalgan pasado alas-8 kagahapon sa buntag sa mga batang mamasurahay diha sa sapa nga nagbitay nga may higot nga pisi sa iyang liog ug ang pikas tumoy sa pisi gihigot ngadto sa sanga.

Ang inahan nga si Lusviminda, 43, nga nahinabi sa Banat News miingon nga wala mouli si Pepito sa ilang panimay ug iyang nahibaw-an nga nakig-inom kini sa iyang higala nga si Edward. Nasuta nga gidudahan si Renald sa inahan nga maoy mikuha sa tinagoan niining kwarta maong gisukit-sukit kini apan mihimakak ug pagkahuman milakaw nga wala mananghid.

Sila si SPO3 Roger Nedamo, PO3 Wetzel Berry ug PO2 Nilo Aventurado sa Homicide Section miingon nga hugot nga mihimakak ang inahan nga iyang gikasab-an ang anak sa wala pa kini mapalgi nga naghikog.

Nasayran sa kapulisan nga ang nagkuha sa kuwarta sa inahan ang barkada ra sab ni Renald. Wala hinuon masuta kun pila gyud ang kuwarta sa inahan nga gikawat sa barkada ni Renald.

Niadtong Miyerkules sa buntag, usa ka Nyriche Niere, 29, dalaga ang napalgang nagbitay usab ug may pisi sa liog sulod sa bodega sa ilang panimalay sa JM. Basa St. barangay San Nicolas ning dakbayan.

Base sa imbestigasyon sa grupo nila ni PO2 Jodan Batucan, PO2 Lou Pagara ug PO2 Michael Codaste sa Homicide Section sa CCPO, ang amahan ni Niere nga si Presco maoy nakakaplag niini.

Gigamit ni Neire sa paghikog mao ang usa ka 75 ka pulgadas nga pisi nga maoy gihigot sa iyang liog ngadto na sa kahoy sa ibabaw sa bodega. Ang mga sakop sa Emergency Rescue Unit Foundation (ERUF) nga si Joemar Josol mideklarar nga wa na kini kinabuhi.

Nakuha diha sa duol niini ang usa ka notebook nga adunay suicide note.

Sayo niining semanaha, usa ka teller sa bangko nga usa ka mahuyang (dili babaye base sa unang migawas nga report) ang naghikog sa punoan sa mangga duol sa ilang panimay sa barangay Colawin sa lungsod sa Argao. (BANAT NEWS)