54 ka PUJ gipamulta tungod way basurahan
CEBU, Philippines - Daghang mga pasaheroan sa kadalanan sa siyudad ang nasakpang nakalapas sa Solid Waste Management Act human 54 ka mga drayber nga naisyuhan kagahapon og mga citation tickets tungod kay walay tarong nga basurahan.
Ang dakbayan hugot karong mipatuman sa no-segregation, no collection policy ug ang mga jeepney kinahanglang adunay duha ka klase nga basurahan alang sa malata ug dili malata nga basura.
Matud pa sa administrative officer sa City Environmental Sanitation Enforcement Team (Ceset) nga si Eric Surban nga ang driver nga wala motuman niini makabayad og P500 nga violation fee.
Dugang pa ni Surban nga duna na sila’y mga deputized agents nga motabang og inspeksyon sa mga PUJ.
Panghinaut niya nga mokooperar ang mga drayber sa ilang kampanya sa saktong pag-segregate sa basura.
Gawas sa pagsusi sa mga basurahan , giapil usab nila pag-monitor ang mga tawo nga manigarilyo sulod sa PUJ kung diin P500 gihapon ang multa niini.
Sa laing bahin, subling mipahimangno ang CESET ngadto sa publiko nga dili gyud iplastar ang mga basura sa kalsada kun dili oras sa tingkuha sa basura aron dili kini magkatag sa kalsada. (BANAT NEWS)
- Latest
- Trending
