Driver positibo sa illegal drugs
CEBU, Philippines - Usa ka drayber sa bus de pasaheroan nadiskobrehang positibo sa paggamit sa ginadiling drugas atol sa gipahigayong surprise random drug test nga gipasiugdahan sa Land Transportation Office (LTO) ug Land Transportation Franchising and Regulatory Board (LTFRB) sa South Bus Terminal kagahapon sa buntag.
Si Ronald Letegio Cotamora nga taga barangay Tangil sa lungsod sa Dumanjug ug drayber sa minibus nga nagbiyahian og Dumanjug wala kaikyas dihang gisuta sa taga LTO ug LTFRB ang sulod sa iyang lawas.
Usa ka agent sa LTO- miingon nga ilang nailhan pinaagi sa ‘strip’ nga migamit og drugas si Cotamora.
Si Regional Director Raul Aguilos sa LTO7 nga nahinabi sa Banat News nagkanayon nga subject for confirmatory test pa si Cotamora kun tinuod ba nga migamit kini og drugas samtang nagmaneho sa iyang minibus.
Matud ni Aguilos nga kun mapositibo sa resulta sa confirmatory test si Cotamora anha pa nila kompiskaha ug rebokaha ang lisensya sa pag-maneho og sakyanan niini ug ipaubos una kini og rehabilitation sa dili pa nila pamultahon og P15 mil.
Si Cotamora usa lang sa mga drayber nga gipaubos sa drug test kagahapon, apan dihang nasayran niya nga positibo siyang tiggamitan og ginadiling drugas nagdali siyang mibiya ug migawas sa terminal.
Si Aguilos nagkanayon nga ang ilang kalihokan tipik ug kabahin sa ilang paglusad sa Decade of Action for Road Safety lukop nasud.
Si LTFRB-7 Regional Director Ahmed Cuizon nagkanayon nga ang maong programa gitumong aron walay kabataang masugamak sa disgrasya atol sa pag-abli sa klase karong sunod buwan. (WC)(BANAT NEWS)
- Latest
- Trending
