Radaza miduaw sa kapolisan sa Olango

CEBU, Philippines - Personal nga gibisitahan ni Lapulapu City Mayor Paz Radaza ug Lapulapu City DILG Operation Officer Johnjoan Mende ang kapolisan sa Station 1 nga nahimutang sa Brgy. Sta. Rosa Isla sa Olango kagahapon sa buntag.

Matud pa ni Mende ang gihimo ni Mayor Radaza ang pagbisita isip pagsanong sa Memorandum ni DILG Secretary Jesse Robredo nga naghatag og tahas sa mga local nga opisyal sa pagsusi sa kahimtang sa ilang mga polis sa matag dakbayan ug munisipalidad.

Atol sa maong inspection gipadayag ni P/Insp. Damiano Montebon Jr. ang hepe sa Station 1 nga kulang kaayo og polis ang tulo ka gagmay’ng isla sa   Olango ug mao kini usa sa ilang dakong suliran.

Nasuta sa Banat News nga adunay 38,058 ang populasyon ang Isla sa Olango apan 20 lamang ka mga polis ang anaa sa Station 1 ug 41 ka mga Unified Task Force (UTF).

Sa isla sa Cawhagan, Caubian ug Pangan-an tagtulo ra ka polis ang gidestino uban sa tag lima ka UTF sa matag isla nga magpulipuli og duty sulod sa 24 oras.

Lakip sa problema nga gipaabot ni Insp. Montebon ngadto ni Mayor Radaza mao ang kakulangan sa ilang sakyanan sa pagresponde ug alarma.

Matud pa niya nga usa lamang ka patrol car ang nagdagan sa tibuok isla kay may usa unta ka motorsiklo nga kauban sa maong patrol car apan naguba na usab kini karon.

Gumikan niini si Mayor Radaza mipasalig nga hatagan kini og dugang motorsiklo aron makalihok dayon ang kapolisan sa pagresponde sa mga alarma sa krimen nga mahitabo sa maong mga lugar.

Gipasalig usab ni Mayor Radaza nga hatagan ang kapolisan sa Olango og sakyanan sa dagat nga ikagukod niadtong mga mananagat nga mohimo og illegal nga panagat. (BANAT NEWS)