CEBU, Philippines - Ang kagamhanan sa dakbayan sa Talisay mopahigayon og laing tigom karong adlawa (Huwebes) didto sa bag-ong merkado sa barangay Lagtang aron matuki kung madayon ba ang pagbalhin sa mga vendor sa merkado sa Tabunok ngadto sa bag-ong merkado sa barangay Lagtang karong Mayor 28, 2011.
Human sa nahitabong rally sa mga vendor niadtong Martes sa buntag si Mayor Socrates Fernandez nakigtigom sa mga sakop sa konseho ug mga department head aron mokuha og mga opinyon kabahin sa problema sa mga manindahay sa merkado.
Si Konsehal Rodolfo Cabigas nagkanayon nga mahibaw-an unya sa tigom karong adlawa kung madayon ba gyud sa pagbalhin o dili ang maong mga vendor.
Kahinumdoman nga mokabat sa 300 ka mga vendor ang nag-rally atubangan sa city hall nga nagpadayag sa ilang dakong pagsupak sa plano sa pagpabalhin kanila ngadto sa bag-ong merkado sa Lagtang.
Ang maong mga vendor nagsul-ob og itom nga t-shirt ug nagtaud og mga puwang ribbon sa ilang mga bukton pagpakita sa ilang pagsupak sa tumong sa siyudad sa pagpabalhin nila.
Ang association og Vendors in Tabunok Public Market ug ubang mga konsumedor nangangkon nga wala sila konsultaha pinaagi sa public hearing sa wala pa ipatukod ang bag-ong merkado sa Lagtang.
Ang mga vendor nabalaka nga maapektohan ang ilang kita kung mabalhin sila ngadto sa bag-ong merkado tungod kay laayan na unya moadto ang mga konsumedor tungod sa pagkatuyoon sa maong dapit.
Ang public-cum-terminal sa Lagtang natukod niadtong tuig 2004 dihang si Kongresista Eduardo Gullas mao pay mayor sa dakbayan sa Talisay.
Niining bag-o lang ang maong proyekto nakompleto ug ang mga opisyal sa siyudad mihukom nga buksan na kini karong Mayo 28, 2011. (BANAT NEWS)