Bukid sa Naga landslide prone area-Chiong

CEBU, Philippines - Gideklara sa Mines and Geosciences Bureau (MGB) nga usa ka landslide prone area o delikado ug dili na papuy-an tungod sa pagdahili sa yuta sa parte sa bukirang barangay sa Bairan, dakbayan sa Naga nga nahunlak sayo niining semanaha.

Si Mayor Valdemar Chiong nagkanayon nga gitun-an sa MGB ang nahisgutang dapit ug nasutang usa kini ka landslide prone area ug gipahimangnoan ang publiko ug mga residente sa maong lugar nga dili pabalikon aron malikayan ang disgrasya.

Kahinumduman nga tungod sa uwan ang bukirang bahin sa Bairan midahili niadtong Domingo sa hapon.

Si Chiong nagkanayon nga nasuta nga ang yuta diha sa lugar nga midahili lapukon ug humok.

Sa maong hitabo usa ka 65-anyos nga si Marcial Lacara residente sa lugar ang naangol. Sa pagsunod sa kamanduan sa MGB ang kagamhanan sa Naga mipahimangno sa mga residente nga mibakwit nga dili na pabalikon ilabi na niining pagsige og bundak sa uwan.

Ang mayor mibutyag nga ang mga 15 ka apektadong pamilya nagpuyo karon tipon sa ilang mga paryente.

Ang kagamhanan sa Naga mohatag og P10,000 nga pinansiyal nga hinabang ngadto sa nahisgutang mga apektado aron makapatukod sila og bag-ong mga kapuy-an. (Brenda D. Batuto/EIM)

Joavan ‘nangulata’ sa uyab gi-alarma

Ni Rey B. Pasaporte

Subli na usab nalambigit sa kasamok si Joavan Fernandez ang kontrobersyal nga sinagop ni Talisay City Mayor Socrates Fernandez human kini gipasanginlang mikulata sa iyang hinigugma ug mipugos sa pagpasakay niini ngadto sa iyang sakyanan sa miaging gabii diha sa barangay Carreta siyudad sa Sugbu.

Apan ang iyang uyab nga si Doreen Isidro, 20, nakahukom nga dili mopasaka og kaso batok kang Joavan sumala pa ni Chief Inspector George Ylanan, hepe sa Investigation and Detective Management Branch (IDMB) sa Cebu City Police Office (CCPO).

Dihang naabot na ang kapulisan nakit-an pa si Joavan nga sakay sa iyang Isuzu Big Horn ug daling mibiya sa maong dapit.

Si Ylanan miingon nga usa ka residente maoy nanawag kanila human nakit-ang gikulata ni Joavan ang uyab ug pugsanong gipasakay ngadto sa sakyanan niini.

Matud ni Ylanan nga ang maong hitabo usa ka pribadong butang sa duha ka managhigugmaay.

Human sa hitabo ilahang gipangutana si   Isidro kun andam ba kining mopasaka og kaso batok kang Joavan apan miingon kini nga dili siya interesadong mokiha sa iyang uyab. (BANAT NEWS)