Kompletong ngalan ni Lolipop giaprobahan

CEBU, Philippines - Giaprobahan sa konseho sa dakbayan sa Mandaue nga si konsehal Emmarie “Lolipop” Ouano-Dizon tawgon na ning maong opisyal niyang ngalan.

Kini nahimo human siya mopalanog sa iyang privilege speech sa regular nga sesyon sa konseho sa miaging adlaw.

Matud pa niya nga mahinungdanon kaayo sa iyang kinabuhi ug pagkatawo ang bansagong Ouano kay naghatag kini kaniya og dakong dungog ug sa iyang amahan ug mga katigulangan sa iyang pamilya.

Labaw sa tanan matud pa niya nga nahipatik na kini sa panumdoman sa Mandauehanon nga siya kaliwat sa mga Ouano.

Gipasabot ni Kon. Ouano-Dizon nga dako usab ang iyang pagtahod sa bansagon sa iyang kapikas nga si Jojo Dizon ug gumikan niini iyang gihangyo ang konseho sa pagtawag kaniya sa nganlang Kon. Emmarie “Lolipop” Ouano-Dizon sa tanan niining mga komunikasyon ngadto kaniya ug sa pagpresentar kaniya ngadto sa publiko.

Si Vice Mayor Glenn Bercede nga maoy chairman sa konseho sa maong dakbayan misabot sa hangyo ni Kon. Ouano-Dizon hinungdan nga ila kining giaprobahan ug gimandoan ang SP Secretary nga himoon nang Ouano-Dizon ang tanang komunikasyon nga ipaabot ngadto ni Kon. Ouano-Dizon.

Ang mga pamahayag ni Kon. Ouano-Dizon nakapadasig usab kang Kon. Nenita Layese kinsa buot usab nga kompletohon ang tawag kaniya nga Kon. Nenita Ceniza-Layese sa matag komunikasyon ug transaksiyon sa dakbayan sa Mandaue.

Sama kang Lolipop, natuman usab ang hangyo ni Layese ug aprobado usab sa konseho. (BANAT NEWS)