Disgrasya sa motor backrider patay

CEBU, Philippines - Patay ang backrider nga lalaki ug kritikal ang drayber sa motorsiklo human kini mokawat sa pikas linya ug nagkabangga sa gikasugat nga sakyanan sa barangay Damolog lungsod sa Sogod niadtong Lunes sa alas 2:40 sa hapon.

Ang namatay mao si Roderick Pacdaco, 29, taga Nivel Hills sa barangay Lahug ning dakbayan sa Sugbo samtang naangol ang drayber niini nga si Roldan Capangpangan Penote, 30, taga Cogon-Ramos ning dakbayan sa Sugbo.

Ang duha napunggit sa Isuzu Trooper sports utility vehicle (SUV) dunay plaka nga GPR-884 nga gimaneho ni Renato Coyoca De Leon, 51, taga Poblacion Daanbantayan.

Matud ni PO1 Edmund Sumalinog, traffic investigator sa Sogod Police dihang nahinabi sa Banat News ang motorsiklo gikan sa siyudad sa Mandaue paingon sa siyudad sa Bogo.

Pag-abot sa kurbadahon nga karsada sa barangay Damolog mikawat sa pikas linya ang motorsiklo ug naatol nga maoy pag-agi sa Isuzu Trooper gikan sa Daanbantayan ug napunggit ang duha.

Nalabay ang motorsiklo ug natagak ang mga sakay niini, si Pacdaco way swerteng nalatayan sa ulo sa ligid sa maong SUV ug nabuak ang helmet niini ug napiyapi ang pikas nga bahin sa nawong samtang si Penote nabunal sa dalan.

Ang mga biktima daling gihatud sa Juan Dosado District Hospital apan gideklarar nga patay na si Pacdaco.

Samtang ang drayber nga nakadasmag kanila boluntaryong mitahan sa kapulisan. (EIM)

(BANAT NEWS)